![](https://blogger.googleusercontent.com/img/b/R29vZ2xl/AVvXsEhMGbwXo0EGqvFIl2l_2d-vGxtXe4r40Kg4qweztGsMWB1P7pA3wJfp8B9s1bzFsV6yHBtXBENUOvsQ5pfdujsXlKgQEFn3nRg9J_MzkX4fO9a-_aJQhzlU5E0ILCY4lnjnKsuRhf3WGCM/s1600/1.jpg)
பதவி நீக்கப்பட்டவரும் சரி, பதவி பெற்றிருப்பவரும் சரி, இருவருமே தமிழர்கள். சுஜாதா சிங், இந்திய உளவுத்துறையான ஐ.பி., தலைவராக பதவி வகித்த டி.வி.ராஜேஸ்வரின் மகள். சேலத்தை சேர்ந்தவர்; காங்கிரஸ் கட்சிக்கு நீண்ட காலம் விசுவாசமாக இருந்த காரணத்தால், ஓய்வுக்குப்பின் அவருக்கு உ.பி., மாநில கவர்னர் பதவி கிடைத்தது. அந்தக்காரணமோ, வேறு என்னவோ, பதவிக்காலம் முடிவதற்கு எட்டு மாதங்கள் முன்னதாகவே, சுஜாதா, பதவி நீக்கம் செய்யப்பட்டு விட்டார்.
![](https://blogger.googleusercontent.com/img/b/R29vZ2xl/AVvXsEhMdJ2a4hLOC4DRW0V6N2shISKnxT9expfXJHs9OVzI1HKE9eLwpv_gcdtefW-ZLWA0scj7gYDBMSh7v1-1BDjdkxRyASfnFHn2oaHHfB1hd0SWNIpcToA-6WSJkusE_9JOLLsZYN-skgA/s1600/2.jpg)
அமெரிக்காவுடன், அணுசக்தி உடன்பாடு ஏற்படுவதிலும் இவரது பங்கே பிரதானமாக இருந்தது. ஐ.எப்.எஸ்., அதிகாரி தேவ்யானி விவகாரம் பூதாகரமாக கிளம்பியபோது, அமெரிக்காவுக்கான இந்திய தூதராக, முந்தைய காங்கிரஸ் அரசால் நியமிக்கப்பட்ட ஜெய்சங்கர், அடுத்து வந்த மோடி அரசிலும் நற்பெயரை சம்பாதித்து விட்டார்.
மோடியின் அமெரிக்கப் பயணத்துக்கும், பிரசித்தி பெற்ற மேடிஸன் ஸ்கொயர் கூட்டத்துக்கும், சிறப்பான ஏற்பாடுகளை செய்து, மோடியின் கவனத்தை கவர்ந்தவர் ஜெய்சங்கர். ஜெய்சங்கரின் தந்தை சுப்பிரமணியம், சிறந்த ராஜதந்திரி. பாதுகாப்புத்துறை ஆலோசகராக இருந்தவர். சகோதரர் விஜயகுமார், ஐ.ஏ.எஸ்., அதிகாரி. மற்றொரு சகோதரர் சஞ்சய் சுப்பிரமணியம், வரலாற்று ஆய்வாளர். ஜெய்சங்கரின் மனைவி கியாட்டோ, ஜப்பானியப்பெண்.
வெளியுறவுச் செயலாளர் பதவி, திடீரென பறிக்கப்படுவது, இது முதல் முறையல்ல. ராஜிவ் ஆட்சிக்காலத்தில், இலங்கைப் பிரச்னை உச்சத்தில் இருந்தபோது, வெளியுறவுச் செயலாளராக இருந்த தமிழர் ஏ.பி.வெங்கடேஸ்வரன், ராஜினாமா செய்தார்.
செய்தியாளர்களிடம் பேசிய பிரதமர் ராஜிவ், தன்னை அவமதிக்கும் வகையில் பேசியதாக உணர்ந்த வெங்கடேஸ்வரன், தானாக முன்வந்து பதவியில் இருந்து வெளியேறினார். இப்போது, பதவி விலகும் வாய்ப்புக்கூட அளிக்கப்படாமல், சுஜாதா வெளியேற்றப்பட்டுள்ளார். ‘பெற்றோர் செய்த பாவம், பிள்ளைகளைச் சேரும்’ என்பார்கள்; சுஜாதாவின் பதவி நீக்கமும், அப்படித்தான் போலிருக்கிறது!